على روح بسرعه على بيته كان هدوء مسيطر على البيت
طلع جري لاوضه ادهم واتفاجئ من اللي شافه
علي: انت فاكر نفسك بتعمل ايه؟
ادهم: بصلح غلط عملته
علي: وايه هو الغلط ده؟
ادهم: اني رجعت مصر ماكنش المفروض ارجع مصر اصلا
علي: طيب وليلي رايها ايه؟
ادهم: سيبتها خلاص
اتصدم على من قرار ادهم وحس بوجع جامد في قلبه لانه جرب وجع الفراق قبل كده ولحد النهارده ندمان وقلبه لسه موجوع.
علي: انت بتهزر صح؟ انت ما ينفعش تسيب ليلى اوعي تفكر انه كام يوم وتنساها ولا كام سنه! ليلى هتفضل جرح مفتوح بينزف في قلبك باستمرار
ادهم: عارف
على بنرفزه وصوت عالي: ممكن تسيب اللي في ايدك وتكلمني عدل
ادهم قفل شنطته وبص لابوه بهدوء شديد
ادهم: افندم
سليم وريهام سمعوا زعيق على وجم على صوته
ريهام: في ايه يا على مالك؟ صوتك عالي ليه؟
علي: اتبسطي يا هانم وروحي اعملي يالا حفله كبيره على نجاحك انك تفرقي بينهم.
ريهام: بكره ينساها وبكره انا اجيبله ست ستها
علي: بكره؟ هههههه هههههههه بجد
شدها من دراعها ودخلها اوضه ادهم
علي: مفيش بكره اصلا ابنك مسافر
ريهام: انت رايح فين؟ هتغير جو يومين وترجع صح؟
ادهم: لا مسافر ومش راجع تاني
انا اتصلت بالكليه اللي كنت شغال فيها وعقدي لسه ساري وطيارتي خلال 6 ساعات بس مش طايق البيت ولا اللي فيه فهروح المطار من دلوقتي ومش راجع تاني
ريهام: كل ده ليه؟ علشانها؟
ادهم: لا مش علشانها؟ علشان ما اتعودت اعيش في جو كله خداع وتخطيط واذيه وكل ده من مين؟ من اقرب الناس ليا
عارفه انا مش فارق معايا موقف سليم باشا هو بالنسبالي غريب لكن المشكله فيكي انتي
انتي بتوجعيني قوي وما ينفعش اخد اي رد فعل معاكي وعلشان كده سايبهالكم خالص
سليم: انت مش هتسافر مكان فاهم؟
ادهم: ايه هتمنعني ولا تحبسني في البيت.
مسك شنطته وزق سليم بعيد عن طريقه وباس امه على راسها ومشي من غير ما يسمع لاي كلمه بيقولوها
على نزل وراه بصمت
ادهم: مالوش لازمه تيجي معايا اطلع ارتاح اليوم كان طويل النهارده
علي: عايز اتكلم معاك اركب هوصلك
ركبوا وفضلو كتير ساكتين محدش فيهم لاقي كلام يقوله
على وقف بالعربيه وركنها على جنب ادهم بصله ولما لقاه ساكت سكت هو كمان وبص لبره
الساعه 2 بالليل الجو هادي والشوارع رايقه.
اتمني للحظه ان ليلى تشاركه وقت زي ده؟
لا لازم يفوق من احلامه خلاص مفيش ليلى
غمض عنيه علشان يمنعهم انهم يخونوه وينزلو دمعه غصب عنه واتنهد بصوت موجوع
ابوه حاسس باللي جواه ولتاني مره يحس بالعجز مره يوم ما خسر حبيبته والنهارده وهو بيخسر ابنه
فجاه عيط بصوت عالي ادهم اتفاجئ بده وللحظه مش عارف يعمل ايه؟ كبيره جدا بالنسباله ان ابوه يعيط وبسببه
ادهم: انا اسف انا اسف انا اسف ارجوك ما تعيطش ارجوك اسف اسف.
علي: انا مش بعيط بسببك انا بعيط من عجزي وقهره قلبي
ادهم: وليه كل ده؟ ليلى فتره في حياتي حلوه وجميله بس الحياه بتستمر وبكره تبقي مجرد ذكري
علي: لا الحياه ما بتستمرش ولا هتبقي ذكري هتبقي وجع ديما موجود لا بيخف ولا بيتنسي
ادهم: لا ده مجرد كلام بكره تتنسي
علي: مش هتتنسي
ادهم: وانت عرفت منين؟ جربت؟ ما تتكلمش في حاجه متعرفهاش.
علي: معرفهاش هههه؟ انا جربت وجعك ده وعيشته كله لحظه بلحظه واحب اقولك انه الوجع هوهو ولا قل ولا خف قلبي بيوجعني بنفس الطريقه اللي وجعني بيها من 30 سنه
اوعي تضحك على نفسك وتقول – هتنسي والحياه هتستمر لانك ولا هتنسي ولا الحياه هتستمر صدقني
ادهم: انت حبيت قبل امي؟ طيب سيبتها ليه؟
علي: غصب عني ربنا يسامح جدك بقى
ادهم: هههه جدي برضه No comments.
علي: وهو في ايه ممكن يتقال المهم ما تسيبش حبيبتك يا ادهم هتندم( حكاله على على حكايته كلها مع امل من يوم مع عرفها لحد ما افترقوا)
ادهم: خساره انك سيبتها بس انا وضعي مختلف انت محسسني ان انا بسيبها بمزاجي
انا مجبر اسيبها زي ما انت اتجبرت تسيب امل
علي: انا مكنش بايدي حاجه اعملها
ادهم: وانا بايدي ايه؟ مره هزقوها ومره سجنوها هستني لحد ما ينفذ تهديده ويقتلها ولا يبعتلها بلطجيه يغتصبوها؟بايدي ايه؟
علي: اتجوزها وخدها معاك
ادهم: عايزني اتجوزها واخدها من اهلها وبيتها وحياتها واخدها بلد اجنبيه ما تعرفش فيها حد لا طبعا ليلى عمرها ما هترتاح بره ابدا انت ليه ما اخدتش حبيبتك بره وسافرت؟
علي: مكنش وضعي زيك
مكنش عندي شغل او فلوس كل حاجه كانت بتاعت ابويا وانا كنت الشاب الروش المتكل على ابوه لسه ما اشتغلتش ومن غيره ولا حاجه
ادهم: وما اشتغلتش ليه واعتمدت على نفسك؟
علي: لانه قفلها في وشي حاولت واشتغلت فعلا بس اكتر شغله فضلت فيها كانت 3 ايام وبعدها بتطرداشتغلت كل شيئ بني جرسون صبي قهوه صبي ميكانيكي كل حاجه ممكن تخطر في بالك
ادهم: كنت اخدتها وسافرت بعيد عنه زي ما انت بتتطلب مني انا دلوقتي
علي: سبق وقلتلك انها كانت مرتبطه بخالها
خالها هو اللي تولاها بعد موت ابوها وفتحلها بيته هيا وامها وابويا لما اتدخل اذاه هو كمان طرده من بيته وشغله وشرد عياله.
فلو اخدتها هيا هما هيتبهدلو لان ابويا مش هيسيبهم في حاله وفي نفس الوقت مكنتش اقدر افتح بيت واخدهم كلهم
لو انا وهيا بس مكنتش اترددت ابدا حتى لو هناكل طقه ونجوع طقه لكن خالها وعياله ذنبهم ايه؟
كانت هتبقي انانيه مني ساعتها
كان لازم ابعد علشانهم كلهم
ادهم: وده نفس اللي انا بعمله لازم ابعد
انا اسف انك افترقت عن حبيبتك بس انا غيرك وماتحسش بتانيب ضمير انا مش زعلان منك في حاجه
علي: ادهم انا.
قاطعه: ما تقولش حاجه تاني كفايه يالا هسيبك انا وانزل ابقي تعال زورني لاني مش هنزل هنا تاني سلام
نزل من العربيه ودخل المطار يستني طيارته
انتظار طويل وممل.
على مش عارف يعمل ايه او يتصرف ازاي؟
الساعه قربت على 4 الفجر ابنه هيسافر
مفيش غيرها ممكن تقنعه انه ما يسافرش لازم يروحلها بسرعه ازاي مفكرش فيها لحد دلوقتي؟
راح خبط على بابهم وكله قام مفزوع من نومه
قام خالد بسرعه يفتح الباب واتفاجئ لما لقي على قدامه
علي: اسف يا ابني اني باجي في وقت متأخر بس الموضوع ما يحتملش التاخير
خالد: يعني ما يتاخرش ساعتين تلاته لحد ما النهار يطلع؟
علي: لا ساعتها هيكون خلاص فات الاوان
عم فتحي: يا ابني اتعلم الذوق وافتح الباب اتفضل يا سعاده البيه اتفضل
علي: متشكر واسف مره تانيه
عم فتحي: لا ولا يهمك خير؟
علي: عايز اتكلم مع ليلى بسرعه
ليلى خرجت من اوضتها وشكلها يغني عن اي كلام
ليلى: عايز مني ايه؟ سيبوني في حالي بقى
خالد: اديك سمعت اهوه
علي: ادهم مسافر ومش هيرجع تاني وانا عارفه لو سافر يا ليلى فعلا مش هيرجع ساعديني اخلي ابني جنبي ارجوكي.
خالد: وهيا هتعمله ايه يعني ماهو رمالها دبلته ومشي؟
علي: انتي الوحيده اللي تقدر تمنعه
انتي الوحيده اللي ممكن يسمعلك
ليلى: بيتهيألك انا قلتله خليك وما تسيبنيش بس ما سمعليش
علي: لانه خايف عليكي مهزوز وفاقد ثقته في نفسه وانتي لمتيه على اللي حصلك كلكم لمتوه مع انه حصل غصب عنه
حسستيه انك فقدتي ايمانك وثقتك فيه
حسستيه انك فقدتي الامان وده مفيش راجل هيقبله ابدا.
لو هو مش هيقدر يحسس شريكته بالامان ويقد يحميها يبقي ساعتها لازم يمشي
خالد: ماهو ده اللي حصل هو معرفش يحميها
ومش هينفع يقف قصاد امه وجده ويعلنها حرب فقراره صح
علي: بمجرد ما يتجوزا كل الحروب دي هتقل واول ما يخلفوا هتنتهي كل العداوات ومش هيبقي غير الحب وبس
صدقيني يا ليلى ما تضيعهوش من ايدك
انتو الاتنين هتتعذبوا كتير بعيد عن بعض
ليلى حبيبك محتاجلك اكتر من اي حد.
ليلى: لو محتاجلي كان فضل جنبي مش يسيبني وكمان هيسافر
لو ده قراره يبقي خليه يسافر
على: انت سمحتيله يمشي
ليلى: لأ هو مشي لوحده
علي: لما يشوف في عنيكي خوف ولوم لازم يمشي
ليلى: كنت عايزني اعمل ايه؟؟
علي: كان المفروض تفضلي في حضنه وتضميه وتقوليله انكم مع بعض مهما يحصل وانكم اقوي طول ما ايديكم في ايدين بعض
كان لازم ترجعيله ثقته في نفسه
كان لازم تقوليله انه هو الامان بالنسبالك.
كان لازم تفهميه ان ثقتك فيه عمرها ما اتهزت
ابدا ومهما يحصل هتفضلي معاه
ده اللي كان لازم تعمليه
الوقت بيعدي قرري هتسيبيه يمشي ولا هتتمسكي بيه؟
في المطار بينادوا على الطياره بتاعت ادهم
اخيرا وقت الانتظار خلص وهيسافر من تاني
مسك شنطته وقام بكسل رايح يدخل
لسه قدامه اجراءات يخلصها
بقاله ساعتين قاعد ليه ما دخلش جوه وفضل بره في صاله الانتظار؟ ليه مستني لاخر لحظه؟ قلبه مستني مين يجيله؟ ليلى ما تعرفش انه مسافر اصلا طيب مستني ليه؟
لازم يقوم ويدخل لازم
قام ومشي ووقف قدام الباب خلاص مفيش رجوع خلاص حياته هنا انتهت.
ادهم ادهم ادهم
معقوله ده صوتها ولا بيتهياله؟
اكيد بيتهياله اكيد لا زم يكمل وما يبصش وراه
ادهم هتسيبني بجد؟
لا ده بجد مش حلم بص وراه وشافها
ليه جيتي يا ليلى كده صعب انه يمشي؟ ليه بتصعبيها قوي كده؟؟
وقف مكانه ولا قادر يمشي ولا قادر يروحلها ومش عارف يعمل ايه؟
### اباشا هتعدي ولا ايه؟ افتح الطريق لو سمحت
ادهم اتضطر يتحرك من مكانه
ادهم: ايه اللي جابك يا ليلى وجيتي ليه؟
ليلى: انت بجد مش عايز تشوفني تاني؟ بتروح لبعيد قوي كده ليه؟؟ علشان معرفش اوصلك؟ ليه بطلت تحبني؟
ادهم: انا عمري ما بطلت احبك ابدا ولا هبطل
ليلى: طيب بتسيبني ليه؟
ادهم: لاني مش عارف افضل! خايف عليكي تتاذي بسببي مش هستحمل لو جرالك حاجه ومش هخاطر بيكي
ليلى: انا هموت لو سيبتني دي مش اذيه؟ وبايدك انت
ادهم: كده ارحم صدقيني.
ليلى: انا عندي اموت ولا اني اعيش من غيرك انت فاهم؟ يوم واحد في حضنك احسن عندي من مليون سنه بعيد عنك
ادهم: ما تصعبيهاش يا ليلى اكتر ماهي صعبه
ليلى: خليك في حضني خليك معايا
ارجوك ما تحرمنيش منك ومن حضنك
ادهم: ارجوكي انتي سيبيني امشي وانسيني
ليلى: حد بينسي روحه؟ انت روحي وعقلي وكياني كله انت الاول والاخير
ادهم: ارجوكي يا ليلى كفايه
انا بحبك وهفضل احبك على طول.
ودلوقتي مع السلامه ارجعي بيتك وعيشي حياتك وانسيني
ليلى: اد
ادهم: هششش خلاص انسيني سلام
لف وشه ومشي ودمعه فرت غصب عنه مسحها بسرعه قبل ما يعترف هو بيها
مرضيش يبص وراه لانه لو بصلها هيرجع
مشي وهو ماشي سمع.
